ગુજરાતમાં શેલ(બનાવટી) કંપનીના કેસમાં હવે EDએ એન્ટ્રી કરી છે. 200 બનાવટી કંપની ખોલીને કરોડોની ટેક્સ ચોરી કરવાના કેસમાં EDએ સર્ચ ઓપરેશન હાથ ધર્યું છે. રાજ્યમાં 23 જગ્યાએ દરોડા પાડ્યા છે. જેમાં અમદાવાદ, ભાવનગર, જૂનાગઢ, વેરાવળ ,રાજકોટ, સુરત અને કોડીનારનો સમાવેશ થાય છે.
આ કેસમાં પત્રકાર મહેશ લાંગા સહિત અનેક આરોપીની ધરપકડ થઈ ચૂકી છે. અમદાવાદ પોલીસના સપાટા બાદ હવે કેન્દ્રીય એજન્સીએ પણ ઝૂકાવ્યું છે. ઇડીએ નવેસરથી ફરિયાદ દાખલ કરી રેડની કરવાની કાર્યવાહી શરૂ કરી છે.
ભાજપના ધારાસભ્યના પુત્રની પણ થઈ હતી પૂછપરછ
ડાયરેક્ટર જનરલ ઓફ ગુડ્સ એન્ડ સર્વિસ ટેકસ ઇન્ટેલિજન્સ (DGGI)એ અમદાવાદ ક્રાઇમ બ્રાન્ચને આપેલી માહિતીના આધારે અમદાવાદ, જુનાગઢ, સુરત, ખેડા અને ભાવનગરના 14 જગ્યાએ દરોડાની કાર્યવાહી હાથ ધરવામાં આવી હતી. જેમાં કુલ 12 બોગસ પેઢીઓ બનાવનાર 33થી વધુ સંચાલકોની અટકાયત કરાઈ હતી. જેમાં સૌરાષ્ટ્રના ભાજપના ધારાસભ્ય ભગવાન બારડના પુત્ર અજય બારડ અને પત્રકાર મહેશ લાંગાની પણ પૂછપરછ કરાઈ હતી. પ્રાથમિક તપાસમાં બધાએ ભેગા મળીને સમગ્ર દેશમાં 200થી વધુ બોગસ પેઢીઓ દ્વારા કરોડો રૂપિયાનું ઇનપુટ ટેક્સ ક્રેડિટનું કૌભાંડ કરાયું હોવાનું ખુલ્યું છે.
ક્રાઈમ બ્રાન્ચ, EOW અને SOGની ટીમો દ્વારા દરોડા
સેન્ટ્રલ GST દ્વારા ક્રાઇમ બ્રાન્ચની ફરિયાદના આધારે, અમદાવાદ, જૂનાગઢ, સુરત, ખેડા, ભાવનગર સહિત રાજ્યભરમાં 14 સ્થળોએ ક્રાઈમ બ્રાન્ચ, EOW અને SOGની ટીમો દ્વારા દરોડા અને તપાસ હાથ ધરવામાં આવી હતી. સમગ્ર દેશમાં 200થી વધુ છેતરપિંડીથી બનાવેલી કંપનીઓ/એકમો સંગઠિત રીતે કામ કરી રહી છે, જેથી બોગસ ઇનપુટ ટેક્સ ક્રેડિટ મેળવીને અને પાસ કરીને સરકારી તિજોરીને નુકસાન પહોંચાડવામાં છે.
આ પ્રકારની પેઢીઓ બનાવવા માટે બનાવટી ઓળખ અને દસ્તાવેજોનો ઉપયોગ, છેતરપિંડીના રસ્તાઓ અપનાવવામાં આવ્યા હોવાનું પણ સામે આવ્યું છે. આવા બનાવટી બિલિંગ, બનાવટી દસ્તાવેજો અને તથ્યો/દસ્તાવેજોની ખોટી રજૂઆત દ્વારા કરોડો રૂપિયાની આવકને નુકસાન પહોંચાડવા માટે રાષ્ટ્રને નાણાકીય નુકસાન પહોંચાડવા માટે ગુનાહિત કાવતરું કરવા માટે એક મોટું જૂથ કામ કરી રહ્યું છે. જેની હાલ તપાસ ચાલી રહી છે અને કાયદેસરની પ્રક્રિયા હાથ ધરવામાં આવી રહી છે.
DGGIએ ક્રાઈમ બ્રાન્ચમાં ફરિયાદ નોંધાવી
આ પહેલા 7 ઓક્ટોબરે ડાયરેકટોરેટ ઓફ જનરલ ઓફ ગુડસ એન્ડ સર્વિસ ટેક્સ ઇન્ટેલિજન્સ(DGGI)ના ડાયરેક્ટર હિમાંશુ જોષીએ અમદાવાદ ક્રાઇમબ્રાન્ચમાં ફરિયાદ નોંધાવી હતી કે, અમદાવાદની ધ્રુવી એન્ટરપ્રાઇઝના નામે બોગસ કંપની રજિસ્ટર્ડ કરાવી ચોક્કસ ટુકડી દ્વારા બોગસ ઇનપુટ ટેક્સ ક્રેડિટ મેળવવામાં આવી રહી છે. આ ટુકડીએ દેશભરમાં 200થી વધુ બોગસ કંપનીઓ રજિસ્ટર્ડ કરાવીને કરોડો રૂપિયાની બોગસ ઇનપુટ ટેક્સ ક્રેડિટ મેળવી લીધી છે. જેના માટે તેમણે હજારો કરોડના બોગસ બિલો પણ જનરેટ કર્યા હતા.
રાજ્યવ્યાપી દરોડા પાડીને કરચોરી શોધવાની કવાયત
આ ફરિયાદને આધારે અમદાવાદ ક્રાઇમ બ્રાન્ચ, એસઓજી અને આર્થિક ગુના નિવારણ(EOW) શાખા દ્વારા રાજ્યવ્યાપી દરોડા પાડીને કરચોરી શોધવાની કવાયત હાથ ધરી હતી. પ્રાથમિક તપાસમાં જ 200 કરોડથી વધુના કૌભાંડની વિગતો સામે આવી હતી. આ તપાસમાં આ કૌભાંડોનો અને કૌભાંડીઓનો આંકડો વધે તેવી સંભાવના છે.
ગુજરાતમાં બોગસ બિલિંગ કૌભાંડનો આંકડો 50 હજાર કરોડને પાર
દેશભરમાં ગુજરાત જીએસટી કલેક્શનમાં અગ્ર હરોળમાં રહે છે. તેવી જ રીતે કૌભાંડમાં પણ અગ્ર હરોળમાં છે. ગુજરાતમાં હાલ જીએસટી બોગસ બિલિંગ કૌભાંડનો આંકડો 50 હજાર કરોડને પાર થઇ ગયો છે. જુદા જુદા કેસની તપાસ હાલ ચાલી રહી છે.
તપાસમાં સામે આવેલી બોગસ કંપની અને તેના સંચાલકોની વિગતો
1 . ધ્રુવી એન્ટરપ્રાઇઝ
2 . અર્હમ સ્ટીલ પ્રોપરાઇટર નિમેશ મહેન્દ્ર વોરા અને હેતલબેન વોરા
3 . ઓમ કન્ટ્રક્શન, પ્રોપરાઇટર રાજેન્દ્રસિંહ સરવૈયા, વનરાજ સિંહ સરવૈયા, બ્રીજરાજસિંહ સરવૈયા તથા હિત્વરાજસિંહ
4 . શ્રી કનકેશ્વરી એન્ટરપ્રાઇઝ ,̒પ્રોપરાઇટર કાળુભાઇ વાઘ તથા પ્રફુલ્લાભાઇ વજા. મનન વજા, જયેશ વાજા અને વિજય વાઘ
5 . રાજ ઇન્ફ્રા પ્રોપરાઇટર રત્નદીપસિંહ ડોડીયા. જયેશ કુમાર સુતરીયા, અરવિંદભાઇ સુતરીયા
6 . હરેશ કન્ટ્રક્શન કંપની ,પ્રોપરાઇટર નિલેષ નસીત, જયોતિષભાઇ ગોંડલીયા, પ્રભાબેન ગોંડલીયા
7 . ડી.એ. એન્ટરપ્રાઇઝ, પ્રોપરાઇટર મનોજ રામભાઇ લાંગા, વિનુભાઇ નટુભાઇલ પટેલ
8 . ઇથીરાજ કન્ટ્રક્શન પ્રા.લી. પ્રોપરાઇટર નિલેષ નશીત, જયોતિસ ગોંડલીયા. પ્રબાબેન ગોંડલીયા
9 . બી.જે.ઓડેદરા પ્રોપરાઇટર ભગીરથ ભોજાભાઇ ઓડેદરા, કેશુભાઇ જેસાભાઇ ઓડેદરા, ભોજાભાઇ ઓડેદરા, અભાભાઇ ઓડેદરા
10 . આરએમ દાસા ઇન્ફ્રાસ્ટ્રક્ચર પ્રા.લી. પ્રોપરાઇટર નાથભાઇ મેરૂભાઇ દાસા, રણમલભાઇ મેરૂભાઇ દાસા
11 . આર્યન એસોસિએટ્સ પ્રોપરાઇટર અજય ભગવાનભાઇ બારડ. વિજય કાળાભાઇ બારડ, રમેશ કાળાભાઇ બારડ
12 . પૃથ્વી બિલ્ડર્સ પ્રોપરાઇટર પરેશ પ્રદિપભાઇ દોઢીયા
13 . પરેશ પ્રદિપભાઇ દોઢીયાના પ્રોપરાઇટર તથા અન્ય
